បុគ្គលិក គឺជាធនធានដ៏សំខាន់របស់ក្រុមហ៊ុន ហេតុនេះការជ្រើសរើសបុគ្គលិកល្អអោយចូលធ្វើការគឺកត្តាដ៏ចាំបាច់មិនអាចមើលរំលងបាន។ ថៅកែឬអ្នកដឹកនាំដែលឆ្លាសវៃ តែងតែប្រើពេលចូលរួមចំនែកក្នុងការជ្រើសរើសបុគ្គលិកចូលបំរើការងារនៅក្នុងអង្គភាពរបស់ខ្លួន។ អត្ថបទខាងក្រោមនេះ នឹងបង្ហាញពីកត្តាបីចំនុចដែលអ្នកត្រូវរកឲ្យឃើញនៅពេលជ្រើសរើសបុគ្គលិកណាម្នាក់។
- រូបរាងកាយ សុខភាព ជំនាញ
បុគ្គលិកដែលមានប្រសិទ្ធភាព គឺជាបុគ្គលិកដែលមានសុខភាពល្អ និងមានជំនាញក្នុងការអនុវត្តការងារ។ ជំនាញនៅទីនេះ គឺសំដៅទៅលើ Skills ដែលបុគ្គលិកនោះមានដូចជា ការចេះប្រើប្រាស់កុំព្យូរទ័រ ការចេះគូរប្លង់ ។ល។ មានសុខភាពល្អ គឺជាកត្តាទីមួយ ដើម្បីអាចបំពេញការងារបាន ហើយសូមជ្រើសរើសបុគ្គលិកដែលមានសុខភាពល្អ។
- ចំនេះដឹង
ចំនេះដឹងនៅទីនេះ គឺសំដៅទៅលើចំនេះវិជ្ជាដែលបុគ្គលនោះត្រូវមានដើម្បីបំរើការងារ ដូចជាចំនេះដឹងក្នុងការគ្រប់គ្រងហិរញ្ញវត្ថុ ចំនេះដឹងក្នុងការគ្រប់គ្រងហាងទំនិញ ចំនេះដឹងក្នុងការរក្សាចិត្តអតិថិជន ជាដើម។ ជាទូទៅបុគ្គលិកថ្មី មិនអាចមានគ្រប់ចំនុចដែលថៅកែចង់បានឡើយ ហេតុនេះពួកគេត្រូវទទួលបានការបណ្តុះបណ្តាល ដើម្បីទទួលបានចំនេះដឹងគ្រប់គ្រាន់ក្នុងការអនុវត្តការងារ។
- បេះដូង/ឆន្ទះ (Heart)
ផ្នែកដែលសំខាន់ដែលមិនអាចខ្វះបាននោះគឺ បេះដូងឬឆន្ទះ ក្នុងការអនុវត្តការងាររបស់បុគ្គលិក។ បុគ្គលិកដែលមានឆន្ទះ តែងតែរិះរកគ្រប់មធ្យោបាយដើម្បីសម្រេចការងាររបស់ខ្លួន ហើយពួកគេតែងតែប្រឹងប្រែងរកគំនិតថ្មីដើម្បីអោយក្រុមហ៊ុនរីកចម្រើន។ បុគ្គលិកដែលមានឆន្ទះ តែខ្វះចំនេះដឹងគឺអាចបណ្តុះបណ្តាលបាន ប៉ុន្តែបើមានចំនេះដឹង តែខ្វះឆន្ទះគឺពិបាកណាស់ក្នុងការបណ្តុះបណ្តាល។ វាមិនមែនជារឿងងាយទេ ដែលត្រូវបង្រៀនមនុស្សម្នាក់ឲ្យចេះស្រលាញ់និងមានឆន្ទះមុះមុតក្នុងការងារណាមួយ។
ហេតុនេះ ក្នុងនាមជាអ្នកដឹកនាំ ថ្នាក់គ្រប់គ្រង ត្រូវសង្គេតមើលបុគ្គលិករបស់ខ្លួន តើពួកគេមានចំនុចទាំងបីនេះទេ។ អ្នកគួរជ្រើសរើសបុគ្គលិកដែលមានបេះដូងស្រលាញ់ការងារ ជាជាងជ្រើសរើសបុគ្គលិកដែលមានចំនេះដឹងពេញខ្លួន តែគ្មានឆន្ទះក្នុងការអនុវត្តការងារ។
អត្ថបទដោយ៖ Rosmeanney
ភាសាខ្មែរ 
English 